中環出更：專資會聯誼 拉隊聽中樂
專業及資深行政人員協會（專資會）個名聽落似乎好嚴肅，但實情會內成員個個都活躍好動，佢哋隔個月就會搞一次聯誼活動，好似去濕地公園、聽吓音樂會輕鬆吓。卓妮日前行經尖沙咀文化中心時，就咁啱遇到專資會會長謝偉銓（Tony）拉大隊欣賞香港中樂團演奏嘅歌后鄧麗君經典之夜，唔少人仲一家現身享受家庭樂，認真溫馨。
會員多是音樂發燒友
Tony同太太及囡囡Mimi嚟聽音樂，佢話該會有唔少成員都係音樂發燒友，咁啱理事梁廣灝仲係身兼中樂團副主席，所以大家不時相約欣賞中樂兼捧老友場。前會長胡曉明話，佢同太太梁子慧都係中樂團擁躉，聽演奏會係拍拖指定動作。副會長黃偉雄一講音樂就眉飛色舞，佢自小就加入步操樂團，現仍積極培育下一代，下月將帶團到日本千葉縣，參加世界步操音樂節。
身兼該會理事嘅會計師公會會長趙麗娟（Susanna）唔止數口精，仲多才多藝，愛拉奏二胡、吹笛、彈琴及攝影，更曾出任中樂團副主席。熱愛中樂嘅Susanna認為，芸芸樂器之中，中樂最能觸動人心。
著名畫廊季豐軒創辦人季玉年（Catherine）同囡囡黃熙月（Vanessa）及女婿Winston都在場，Vanessa話，誕下囡囡後轉做全職媽媽專心湊女，佢話老公好鍾意小朋友，希望追多個仔。Catherine就心痛愛女為咗湊B，仲瘦過未生之前，希望囡囡食多啲嘢增肥喎。
卓妮