政情：公民講場：爛球場迎賓 德成冇面見人

香港大球場被踢爆以爛地迎賓，令好哋哋一場暑期足球盛事淪為醜聞，影衰香港。民政事務局轄下主責大球場管理嘅康文署就一味靠賴，最高話事人、該局局長曾德成至今依然「龜縮」未有現身回應，唯獨發表每周網誌嘅指定動作冇變，但只係求其交行貨咁介紹瓷器展覽，九唔搭八兼冇回應市民訴求。其實民政事務局「鑊鑊新鮮鑊鑊甘」，遠嘅唔講，近排鬧得熱烘烘嘅粉嶺高爾夫球場收回發展爭議，負責批出租約嘅曾德成一句「無意收回球場」，就任由拍檔發展局局長陳茂波示眾受靶。依家高球場去向未明，大球場又丟人現眼，奉勸曾德成唔好掛住匿埋寫網誌，快啲出嚟收拾殘局喇！