政情：今日你上鏡：袁彌明大晒與男友煙韌照
人民力量主席袁彌明（Erica）接掌人力唔夠兩個星期，就宣布絕食五十小時，以示爭取普選決心。Erica絕食完後，就喺社交網站公開佢同男友林雨陽嘅合照，二人尋日仲一齊去遊行。
與林雨陽並肩遊行
絕食結束後，Erica喺社交網站上載同任「謎網」行政總裁嘅男友林雨陽一張「頭貼頭」煙韌合照，大爆尋日係兩人拍拖三個月嘅大日子。Erica又大讚林雨陽係一個廿四孝男友，除咗幫佢買床褥同蚊帳外，仲喺遮打花園大風大雨期間全程陪伴左右，成為佢絕食時最重要嘅精神支柱。
民陣尋日發起倒波遊行，Erica同林雨陽就用遊行嚟慶祝拍拖三個月。兩人並肩同行，當佢哋行到差唔多一半時，林雨陽突然發現Erica塊面有啲污糟，於是佢就叫Erica停下腳步，非常細心咁幫伊人輕輕撥走臉上污垢，而Erica好聽話咁合上雙眼，仲展露出一個甜到漏嘅笑容，可謂羨煞旁人。