財政司司長鬍鬚曾早前被恒隆主席陳啟宗炮轟，理財未能做到應使則使，歷史會證明佢係「大罪人」，鏡頭前嘅鬍鬚曾笑笑口咁話自己「心情非常沉重」好似唔多在乎，但轉頭就喺尋日發表嘅每周網誌露餡，用比平日多逾一倍嘅字數，洋洋二千字羅列上任六年嘅威水史，仲聲言「熱切期待年底時再一次『估錯數』」，錄得較預期多嘅盈餘，睇嚟鬍鬚曾對「大罪人」嘅指控相當上心喎。
鬍鬚曾今個星期嘅網誌唔再係回首留學美國嘅過去，特別以「錢不是萬能」為題，自稱在任六年，投放基建、醫療、教育、社福嘅資源有多冇少，支出增長仲跑贏收入增幅添。
佢又話，從來唔會對成熟嘅政策撥款說「不」，反駁外界指佢一毛不拔，仲慨嘆「錢」無法令一啲「模糊不清，不合理或沒有效益」嘅訴求變得合理，意有所指咁話部分人嘅無理訴求唔抵幫。
其實鬍鬚曾引用咁多數據支持自己嘅理財原則，無非都係想將「守財奴」責任卸得乾淨，若果佢呢套理財哲學真係行得通，相信歷史總會還佢清白，洗脫「大罪人」嘅惡名，鬍鬚曾使咩急住辯駁？