政情：高永文跳上台 師奶high爆
現屆政府上場後面對不少風波，多名高官民望喺低位徘徊，出咗事嘅更會插水式下跌。食物及衞生局局長高永文一向民望較高，睇吓尋日嘅活動，可能大家會知道點解。
當正明星 爭住合影
高永文個個星期日都早午晚出席多個活動，通常最少走三場。尋日大熱天時下，佢又要一日走勻九龍同新界，為多場活動做主禮嘉賓。佢現身關注心臟健康團體「關心您的心」主辦愛「心」之家計劃開幕禮時，大汗疊細汗，依然笑容滿面。在場師奶見到高永文，當正佢係明星，一大群人拉住佢合照又握手，局長可能心情特別輕鬆，上台主禮時一步跳上兩級樓梯，師奶們竟然歡喜若狂，大讚佢好身手。高永文笑住話自己唔係武林高手，只係心急啫。做官要走入群眾，群眾裏得到師奶支持，民望當然高。
高永文尋日嘅活動包括出席電視台節目，佢喺節目上話，現階段唔會排除撤銷限奶令，但強調首先要確保本地父母有足夠配方奶粉供應，限奶令至可以考慮撤銷。