中環出更：鄭錦鐘名人賽「碌」出冠軍
有「善團界保齡球王」之稱嘅保良局主席鄭錦鐘（Eric），日前再度挑戰深水埗名人保齡球邀請賽，夥拍香港代表隊甘兆麟。去年奪第三名嘅Eric，喺最後一局反敗為勝，勇奪名人賽冠軍，仲拎埋全場最佳姿勢獎添，真係實至名歸。
打完兩局 腳都震埋
小學五年級就打保齡嘅Eric，無師自通打波多年，拎過唔少獎項。上任主席後因為公務繁忙，今次比賽前根本無時間練波，拍檔甘先生亦係賽前透過抽籤配對，之前未夾過。幸好Eric寶刀未老，話咁易落場就拎到第一名，但佢賽後靜雞雞透露，打完兩局後手臂唔覺攰，反而腳都震埋，笑言要同朋友食飯慶功，補番腳骨力。當日比賽同時招待咗四十名基層青少年到場打波，由港隊成員親自指導，打成一片，氣氛熱鬧。
累積波齡多年，Eric當然係高手一名。佢話打波秘笈在於目標清晰，碌波出去前，視線唔好只顧望球道尾嘅保齡球樽。正確做法係望住球道嘅指示箭嘴，對準位置後發力揮球，咁就百發百中嘞。
卓妮