中環出更：與時並進 阿姐專心學板腦
「阿姐」汪明荃位於西貢嘅豪宅日前第三度遭賊人爆竊，整個夾萬被抬走，包括婚戒在內嘅三百萬財物不翼而飛，阿姐大嘆損失慘重，當堂冇晒心機。咁啱案發前幾日，卓妮先至喺中環ifc遇到阿姐與女友人走進一間電子產品旗艦店，向店員請教點用平板電腦，當時阿姐仲好有閒情逸致咁慢慢學習，估唔到之後就發生失竊事件，認真係世事難料。
當日下午兩點幾，身穿長袖風褸、迷彩褲及涼鞋嘅阿姐，與一名女性朋友齊齊現身ifc。當時阿姐以淡妝示人，加上戴住墨鏡、束起馬尾，行蹤甚為低調。但當佢踏進電子產品旗艦店時候，仍被店員及客人認出，不過見慣大場面嘅阿姐好淡定，報以微笑回應。店員上前招呼佢哋，阿姐隨即從手挽袋內拿出一部平板電腦，畀店員檢查機身。
積極向店員發問
店員檢查過平板電腦後，表示機件運作正常，不過好學嘅阿姐冇放過自我增值嘅機會，繼續捉住另一名店員，向對方請教用法，店員亦樂意從旁指導。期間阿姐表現得非常專注，托住頭咁細心聆聽，又不時向店員發問，對方都有問必答。三人企喺店內研究平板電腦，足足傾咗個多小時，最後阿姐帶住滿意嘅笑容，與女友人一同離開。發生劫案後，傳媒報道「事主」汪明荃六十五歲，總之無論幾多歲，都要與時並進，唔好落後於時代就啱嘞。
卓妮