政情：怪醫最後動議被拆骨
本年度嘅立法會開埋今個禮拜就收爐放暑假，聽日最後一次大會嘅最後兩場議員動議，分別畀醫學界梁家騮同體育文化界議員馬逢國抽到。其中外號「怪醫」嘅梁家騮，將會提出「解散醫院管理局」動議，批評醫管局管理不善，浪費公帑云云。不過怪醫未成功解散到醫管局，就率先畀啲立法會同事拆骨，將佢個動議修訂到體無完膚。
斥當局資源分配不均
怪醫尋日同傳媒茶敍介紹佢個動議時，搬出一大堆統計數字力數醫管局對各醫院聯網分配資源不均，強調醫管局喺一一至一二年度用咗高達十一億元出糧畀總部員工，但同樣負責分配資源嘅大學教育資助委員會，就只係用咗三千萬元：「究竟有冇需要用咁多錢先？」不過話說回來，醫管局職能比教資會多好多，怪醫咁樣對比法好似有啲夾硬嚟喎。
怪醫又提到，佢喺上屆立法會都提過類似動議，結果畀其他立法會同事改頭換面，變成要求政府向醫管局增撥資源，同佢嘅原意剛好相反。睇番聽日立法會個議案，兩名泛民議員張超雄同何俊仁分別就怪醫嘅動議提出修訂，兩者不約而同刪走咗「解散」二字，改以「檢討」或「改革」代替，最後又係要求政府向醫管局增撥資源，睇嚟怪醫嘅動議都係凶多吉少。