立法會議員成日都係有口話人冇口話自己，最叻包庇自己友，一有高官被揭漏報利益，班議員又話要譴責，又話要下台，但民主黨議員何俊仁被本報揭發漏報公司股份利益，立會查完一輪之後又係放生了事。
最近立會再被揭一單明顯嚴人寬己嘅事件，原來各政府部門奉行咗十幾年嘅《公開資料守則》，並唔適用於獨立於政府嘅立會秘書處，但多年來都冇人發現同跟進，包括某啲成日狠批政府無按守則向市民公開資料嘅議員。
直至早前行政管理委員會討論相關問題，先至有人提出秘書處係咪要整番套類似嘅政策補鑊，以免遭人口實，但亦有人死撐秘書處大部分資料都已經放晒上網，透明度比好多有守則規管嘅政府部門高好多，係咪有需要整色整水又搞多套嘢。
爭拗咗一輪之後，立會終於喺尋日透過政府新聞處發出新聞稿，宣布將會制訂政策公開秘書處保管嘅資料同檔案畀公眾查閱，並且就有關政策諮詢公眾兩個月，市民可以自行上網瀏覽有關諮詢文件，喺今年九月十一日或之前提交意見。