政情： 鄉局抗堆填 唔通唔夠勳?
港府擴建屯門及打鼓嶺堆填區嘅建議喺多方面強烈反對下，尋日立法會財務委員會通過議案中止辯論，估計最快都要喺暑假後先可以再申請撥款。我哋尋日拆解過三個堆填區困局後，今日再講吓點解鄉議局主席劉皇發（發叔）可以一呼百應，帶動整個鄉議局搞絕食反對擴建屯門堆填區，就連一啲唔太關事嘅上水、粉嶺及元朗十八鄉等都紛紛加入抗爭，有人估計唔知會唔會同港府七一授勳分餅仔唔勻有關呢？
有政界中人透露，鄉議局大部分鄉紳喺去年特首選舉本來力撐前政務司司長唐英年，而佢哋支持唐唐嘅其中一個原因，傳聞係有關方面承諾班鄉紳會獲授勳。
可惜事與願違，自從選舉大勢轉向梁振英（CY）後，鄉紳亦被迫轉軚，而喺CY當選後，原本由發叔擔任嘅行政會議成員一職，都改由鄉議局副主席張學明擔任。
不過，發叔反對擴建屯門堆填區係咪同冇得做行會有關，咁就唔知啦，但佢決定反對既時間，咁啱喺本月初港府授勳之後發生。
發叔被落面 鄉紳紛抗爭
每年政府授勳前夕，港府總會向各屆人士攞提名名單，再從中篩選。據聞港府今年依舊問發叔攞名單，而發叔提交嘅名單就同一年前支持唐唐時嘅名單一模一樣，但結果只有兩名鄉紳分別攞到銅紫荊星章及太平紳士，名單內嘅其他人就冇晒影。據聞呢件事除咗令發叔冇面之外，仲令到一班新界東、西嘅鄉紳對政府大為不滿，感覺就好似「打完齋就唔要和尚」。
咁啱得咁蹺，喺七一授勳之後，發叔突然高調反對擴建屯門堆填區，一聲號令就獲各鄉響應絕食行動，連本來對堆填區冇乜所謂嘅打鼓嶺鄉都加入抗爭。
至於另一個講法，就係環境局局長黃錦星早前公開聲言話同屯門鄉事派傾過偈，了解佢哋嘅諗法，但係發叔就話黃局長冇搵過佢喎，因而有人估計黃局長搵過嘅鄉事派會否就係現任屯門鄉事委員會主席何君堯呢？如果係嘅話，似乎港府要同黃局長惡補一吓，認清邊個先至係新界鄉事派嘅揸fit人喇！