中環出更：囝囝赴京實習 雷添良探班
九巴後人雷添良（Tim）係城中頂尖會計師，佢早年就將兒子Anthony送到英國嘅大學修讀會計科，有意栽培愛兒繼承衣鉢。眨吓眼Anthony經已學有所成，嚟緊仲會喺北京實習，作為廿四孝爸爸嘅阿Tim給予全力支持，仲打算趁暑假專程去北京一趟，度假兼順便探班添。
愛女法律系畢業
Tim後繼有人飲得杯落，而愛女Nicola亦都好有料，剛剛喺英國劍橋法律系畢業，九月就會正式着起律師袍，做個英姿凜凜嘅女大狀。卓妮問佢有冇留意關於九巴嘅近況，佢就坦言只係祖先嗰代創立九巴，到佢呢一代已經冇涉足任何業務，所以對此並無意見，亦唔知道發展成點。
身兼自資專上教育委員會主席、免費幼稚園教育委員會、教育資助委員會成員等公職嘅阿Tim，坦言最近都忙於開會，討論及研究香港教育工作。佢咁關注香港教育發展，但就送晒啲子女到英國留學，莫非佢想吸收外國嘅成功經驗，為香港嘅教育制度提供意見？