政情:姚明做「獅兄」 萬人歡呼

被喻為中國最有影響力人物之一嘅籃球巨人姚明,兩年前宣布退役後,一舉一動仍然引人注目。佢近日加入全球最大嘅非政府組織(NGO)國際獅子會,成為眾多獅兄獅弟嘅一員。當佢喺二萬五千名國際獅子會會員見證下,獲得佩上會員胸章嘅時候,全場掌聲雷動,「姚明獅兄」之歡呼聲此起彼落,彷彿重拾昔日球迷為佢歡呼打氣嘅震撼場面。

回禮送親筆簽名籃球

第九十六屆國際獅子年會近日喺德國漢堡舉行,共有來自二百幾個國家、二萬五千多位會員參加。當地時間七月八日星期一,喺全球首位華人國際會長譚榮根嘅推薦下,姚明正式加入獅子會成為榮譽會員。

譚榮根為姚明佩上胸章,又互送紀念品,姚明獲贈獅子會紀念牌,咁大家估吓佢回送咩禮物?冇錯,就係有錢都買唔到嘅親筆簽名籃球喇!

基地喺香港嘅獅子會中國港澳303區,喺今次國際年會中大豐收,前總監文錦歡當選首位女性華人國際理事,更獲「最佳賑濟飢餓服務獎」及「最傑出青年服務獎」。

第一手消息請下載on.cc東方互動iPhone/iPad/Android/Windows Phone Apps