中環出更：「廠」入馬場 黃靜文做義工
俗語話「一山不能藏二虎」，但凡事都有例外嘅。尋日中華廠商聯合會（廠商會）喺沙田馬場舉行紀念盃賽，雖然懸掛三號風球兼落雨，仍無阻會長施榮懷（Irons）同一班會董拉大隊入場湊熱鬧。今年廠商會盃賽最特別嘅，就係有兩個行政總裁同場出現，包括新上任嘅黃靜文（Adeline）同本月底卸任嘅梁世華（Paul）。
昨未履新 滿場飛打交道
由於尋日係七一公眾假期，所以Adeline應該今日先至履新，難得佢唔介意做義工，滿場飛同會董及賓客打交道，認真抵得諗。佢坦言，可以借呢個機會對商會加深認識，事關會長同副會長就見得多，但會董就有成一百個，要記晒每一個名字都唔容易，但佢就話會加倍努力去記o架喇。
曾任民政事務總署副署長嘅Adeline話，以前專責慈善團體有關事務，今次再見番啲老友感覺好親切，往後亦會加強廠商會同善團嘅聯繫。卓妮見佢苗條咗，佢話以前做官坐得多冇運動，卸任後多走動反而瘦咗。阿Paul就大讚Adeline好幫得手，可以安心交棒。佢仲派咗張新卡片畀卓妮，上面自稱「長者／退休人士」，認真幽默。
廠商會明年成立八十周年，Irons預告重頭戲，將撥捐八位數字予本地一間大學，但捐畀邊間仍未有定案。卓妮見佢曬黑咗又Fit咗，原來佢一向有坐骨神經痛，最近聽醫生話勤游水紓緩痛症，結果減磅之餘，連帶血脂、膽固醇水平都靚晒，做起事都特別起勁喎。
卓妮