維園鴿患恐爆禽流感
野鴿「襲」維園，遊人安全成疑！林小姐經常行經維多利亞公園，發現常有大批野鴿聚集在近銅鑼灣入口的噴水池廣場，部分雀鳥在水池內寫意「戲水」，部分更充當「模特兒」，任由遊人湊近拍照，「早排內地仲爆（發）緊禽流感，康文署見到咁多雀喺個公園都唔理，由得啲人哄到咁埋，真係出咗事咁點？」
勸喻遊人勿餵飼雀鳥
康樂及文化事務署發言人表示，一直有在園內張貼告示，提醒遊人避免接觸野生雀鳥及不應餵飼雀鳥，亦已加強園內清潔工作，包括清理遺留在公園內的食物殘渣及鳥糞，以確保場地清潔衞生。發言人續稱，職員將加強巡視，如發現有市民違規在場內餵飼雀鳥，會即時發出口頭警告勸止，並在有需要時向違例者提出檢控。
「次次去都唔見有職員巡，莫講話勸人唔好餵雀！」林質疑康文署「得個講」，明顯與實際情況不符，要求當局勿輕視野鳥傳播病菌的嚴重性。