立法會議員陳鑑林（橄欖）個仔陳俊傑多月前贏咗觀塘區議會坪石選區補選後，兩父子就籌組聯合辦事處（議辦），尋日終於開張。原來呢個位於坪石邨金石樓地下嘅議辦，橄欖九六年起已作立法局議辦，之後當選坪石區議員，又做埋區議會議辦，至今已用咗近十七年，期間泛民主派多次挑戰議席都係無功而還。
講起議辦嘅歷史，十幾年嚟搞咗四次開幕，最近兩次就分別係辭職加入政府做商務及經濟發展局政治助理嘅前區議員陳百里，另一次就係尋日議辦開幕嘅陳俊傑。唔單止咁，呢個議辦仲培訓出唔少觀塘區議員添，好似現任嘅年輕議員顏汶羽、譚肇卓都喺度做過助理，所以稱得上係少林寺。
唔知係咪有過咁多後生仔先後上位，橄欖喺議辦開幕致詞上話，雖然坪石區逐漸老化，但佢哋就不斷年輕化喎。
如果真係要年輕化，點解橄欖仲未肯讓出立法會議席畀年輕人上位呢？抑或係覺得未有人才接棒呢？莫非佢今次係想透露下屆立法會交棒？