政情：亂象紛呈 責無旁貸 黑英數臭怠惰貪曾
天文台前台長林超英（黑英）退休之後，不時會月旦時事，尋日佢喺一個電台節目大談香港回歸後嘅變化，直言對依家嘅香港好擔心，因為貪污喺政府頂層蔓延、腐蝕政府管治，社會上又有貧窮嚴重、教育被塑造成產業嘅現象，社會積累唔少怨氣。搞成咁，黑英不點名批評「貪曾」前特首曾蔭權爵士責無旁貸，狠批貪曾表現怠惰、施政傾斜富豪，最大污點之一仲有房屋政策。
斥房屋政策搞到一鑊泡
黑英話，佢同太太出身基層，有今日係受咗平等教育同香港嘅恩，正因為咁，佢對香港嘅目前同未來發展有擔憂，亦有期許。佢認為，香港回歸十多年來，貧富懸殊加劇、跨代貧窮成形，基層工時長但工資低，教育更出現「貴價名校無錢莫進來」嘅現象，以致社會流動萎縮，種種現象令人煩躁不安。另一方面，政府頂層又貪污蔓延，管治無力。
追溯近年問題根源，黑英不點名話貪曾怠惰無能、對富豪傾斜，貪曾停建居屋、少建公屋，更把土地供應權以勾地表方式拱手讓畀地產商，搞到香港近年樓價飆升、大量無法置業市民不堪高租金而要遷入劏房。黑英認為香港回歸至今幾乎係原地踏步，白白浪費時間，佢不禁問：「活在這個樣子的香港，年輕人還會覺得有前途嗎？」