政情：自爆年紀大或退休 下屆唔玩 偉俊謝了？
由九龍東三十多名區議員組成嘅創建力量尋日低調開張，除咗擔任主席嘅觀塘區議會主席陳振彬（Bunny）及各位成員在場外，仲有擔任首席顧問嘅立法會議員謝偉俊（Paul），並無請官員。我哋之前講過，有傳創建力量係一把「雙刃刀」，密切監視阿Paul嘅表現，如果表現唔理想，下屆選舉可能唔再畀票阿Paul，搵人取而代之。阿Paul尋日就首次透露下屆可能唔參選。
若屬實 陳振彬或補上
當問及呢班議員下屆立法會選舉會否幫手拉票時？阿Paul就話言之尚早，事關距離下屆選舉仲有咁多時間，好多事都講唔埋，仲話自己嘅年紀已經唔細，可能唔選退休喎！如果阿Paul唔選的話，創建力量又會搵邊個取而代之呢？有地區人士話，呢個人選好可能就係Bunny。阿Paul又話，其實佢同組織嘅區議員都係志同道合嘅朋友，想就社區議題多啲發聲喎。
其實創建力量組成都唔嘢小，事關有三十多名區議員，如果結集做立法會選舉樁腳嘅話，贏一席真係話咁易，所以有人話阿Paul當選就係咁嘅原因，亦有人話佢哋同九龍西嘅西九新動力好相似。