政情：民記內訌 譚Sir精神分裂
港府擴建將軍澳、屯門和打鼓嶺三個堆填區計劃餘波未了，聽聞呢股堆填區臭味蔓延到民建聯（民記）。據聞該黨中央同旗下屯門支部就屯門堆填區嘅立場爆內訌，黨中央支持，但支部就強烈反對，仲會喺後日區議會大會投票反對擴建屯門堆填區動議，擺明摑黨中央一巴。眾所周知，黨主席譚耀宗（譚Sir）係屯門所屬嘅新界西立會議員，如今屯門支部投票反對，搞到佢精神分裂。
消息話，該黨原先對係咪投票支持擴建三個堆填區意向未明，原先西貢將軍澳支部傾向支持擴建，但面對其他黨派區議員爭相絕食、斷食反對擴建，令該黨地區壓力稍增，加上當時正在英國倫敦嘅立法會議員葛珮帆越洋「發功」，支部終在龐大地區反對下，突然發表聲明強烈要求押後審議擴建將軍澳堆填區，殺黨中央一個措手不及，最終仲要走入反對陣營。
傳梁健文揚言退黨表不滿
將軍澳堆填區因地區支部反對意見清晰，同樣反對意見清晰嘅仲有屯門支部，但譚Sir因為港府壓力而當聽唔到，支持擴建屯門堆填區嘅前期研究撥款，惟屯門支部再三討論後都係堅決反對。據聞有黨員揚言有意退黨表達不滿，有傳呢個黨員就係屯門支部主席、屯門區議會副主席梁健文，然而有人將之淡化為衝口而出嘅意氣說話，我哋曾致電梁健文求證但未獲回覆。
雖然「退黨論」疑幻疑真，但屯門支部憤怒了卻係鐵一般事實。消息話，屯門支部再三開會後，共識係覺得一時三刻根本難以「轉軚」支持擴建屯門堆填區，決定企硬喺後日區議會大會反對擴建屯門堆填區動議，恰巧同日立法會工務小組開會繼續審議屯門及打鼓嶺堆填區撥款，換言之該黨立法會黨團除非喺開會前擺平地區反彈，否則極有可能出現喺同一議題上，立法會支持，但區議會反對嘅各有各投尷尬場面，唔知到時邊個要孭鑊問責呢？