中環出更：江明熙病愈不忘慈善 獲容姨義唱
香港醫療專業人員協會（醫專會）早前喺北角新光戲院搞咗場慈善粵曲夜，「生蛇」（帶狀疱疹）剛愈嘅醫專會主席江明熙（Bernard）急急上陣為活動打點，原來當晚出席嘅嘉賓好多，就連甚少睇粵曲嘅食物及衞生局局長高永文、香港大學校務委員會主席梁智鴻等，當然唔少得醫專會副主席鄭淇德醫生啦。
兩人相識十數載
Bernard話，早前發現額頭近眼位置「生蛇」，一度驚生蛇入眼會導致失明，幸好有朋友介紹佢食特製配方龜苓膏，幾日後就痊愈。當晚佢仲精神奕奕聽粵曲，同粉墨登場嘅粵劇紅伶譚倩紅（容姨）有講有笑。原來Bernard同容姨識咗十幾年，容姨知道佢想籌款，二話不說搵埋「明星好友曲藝社」一班成員義唱，三扒兩撥籌得逾四十萬元，臨場再有善長加碼捐多十萬元添，合共籌得超過五十萬元，超額達標。
Bernard話，本來諗住買一部檢查耳鼻喉嘅輕型內窺鏡，方便攜往內地山區義診，依家籌多咗錢，買夠兩部都未定。除咗義診，醫專會嚟緊十一月就五歲生日，Bernard準備搞周年晚宴，同班善長一齊開心吓。
卓妮