中環出更：大女出嫁 田二少叫生夠四個
立法會議員田北辰（田二少）接連辦喜事，繼上月三女田植鏘出嫁後，尋日到大女田植恩（Lauren）下嫁經營社會企業嘅男友謝惠敏（Bobby）。今次一對新人都係虔誠基督徒，早上喺中環聖約翰座堂行禮，中午再到金鐘港麗酒店舉行結婚酒會，唔少政商界名人到賀。恨抱孫嘅田二少就講到明，自己生咗四個仔女，希望兩個女結婚後起碼生夠八個喎！
田二少再做外父風騷到極，同太太梁錦儀喺酒會滿場飛招呼賓客，出席嘉賓有「牛仔褲大王」楊釗、廣東社團總會主席王國強、協成行董事總經理方文雄、利豐集團主席馮國經夫婦、合和實業主席胡應湘夫婦、「蘭桂坊之父」盛智文夫婦、已故「船王」包玉剛三女包陪麗，仲有行政會議召集人林煥光夫婦、前滙豐私人銀行亞洲區行政總裁王以智等。
政商名人將賀禮折現
唔少嘉賓都將賀禮改為折現，響應環保之餘，協助一對新人構建愛巢。田二少致詞時話，當年金融風暴，差啲令佢公司「一鋪清袋」之際，Lauren應承由紐約返港幫佢打理公司，仲忙到拍拖都冇時間，當時愛女話「神自有安排」，好彩如今神終於為佢覓得如意郎君。
田二少坦言對女婿Bobby好滿意，畀足一百分。佢又打趣話，三女嫁咗之後冇再夜瞓同食消夜，健康都好咗，但就孤獨咗啲。
老友問佢大女嫁埋會點？佢話以前夜晚十一、二點，就會同大女開個「二人董事會議」做臨時決策，愛女搬咗出去之後，可能公司都會賺少啲。不過，佢點會做蝕本生意吖，大女幫佢生番四個外孫，條數都喺度啦！
卓妮