新聞故事：古董車醫生遭政府收地迫害
跑馬地畢拉山道盡頭山坡，除了警察爆炸品處理課基地，還有恍如「避世」的古董車車房。廖強與他的車房「短期」租地逾廿年，默默地為曾風光一時、現遭打入冷宮的古董車起死回生，為車主保留珍貴回憶，惟近日政府收地，車房面臨結業，強哥頓時一臉惆悵，擔心手藝分分鐘如古董車一樣遭遺棄。
強哥四十五年前學整車，廿二年前自設車房，雖然他的車房位處偏僻山上，但憑着一手維修古董車技術打響名堂。「大多古董車零件都好難搵，好多停產，要專程搵返嚟，搵唔到甚至要度身訂造代替品，唔似新車咁整一、兩日就搞掂，少啲時間、少啲心血都做唔到！」在講求速度的時代，加上近年車房寸金尺土，古董車維修往往費時「嘥位」，對師傅耐性要求高，市區車房大多婉拒維修，但強哥卻一一收留。
「呢架車係一個老醫生朋友，當年載滿佢同佢老婆由英國嚟到香港嘅回憶。佢話太太好鍾意架車，交低時千叮萬囑一定要行得番！」強哥如數家珍，指着一輛積架跑車說。這車在七十年代風光一時，經歲月摧殘後退下火線，進車房前，車身銹迹斑斑、地台破爛、水箱壞掉，連啟動也困難。
跑車像垂死的老人退居山上，但強哥就在貨櫃搭建而成的車房，賜它回春仙丹。強哥為車身重新髹油、燒焊，修補地台，裝上再造早已停產的水箱。跑車再次開動，引擎聲清脆利落，像車主的青春也給挽回來。強哥一臉滿足，大抵在現代無人會為老古董花一年時間！
「唔通臨老攞綜援？」
車房裏還有多輛六、七十年代的寶馬跑車及平治開篷車，正等待強哥起死回生。惟近日政府向車房發出收地通知，需於七月底前遷出，古董車落入無處容身的困境，強哥一臉惆悵，「整車整咗成世人，搵唔到大錢，都總算可以擔起頭家，咁多年都相安無事，個多月間就將廿幾年心血推倒……勢估唔到捱唔到退休，唔通要我臨老嚟攞綜援？」
圖：吳啟偉
文：李子輝