政情：敗走堆填區 星星食不安
環境局局長黃錦星（星星）尋日見到立會議員嘅時候，竟然第一句就話自己瘦咗。咁啱最近接手跟進政府擴建堆填區建議嘅政務司司長林鄭月娥又係瘦骨仙，究竟係咁啱得咁蹺，抑或呢個係搞環保嘅先決條件呢？
將軍澳堆填區撥款申請因為立法會支持票不足而被迫撤回，而打鼓嶺及屯門嘅堆填區撥款又未能趕及周三通過，林鄭同星星仍然耿耿於懷，尋日出席立法會午宴時，亦不忘講到呢件事。林鄭話下周二再將打鼓嶺及屯門嘅堆填區方案交上工務小組委員會，希望議員提出建議並予以支持。
坐喺另一枱嘅星星見到議員，就呻話自己瘦咗。同枱嘅議員事後都話，見到星星都覺得佢幾辛苦，食咗兩啖就收到個電話，聽完又即去搵林鄭。如此一來，兩個人都無法專心食飯，唔怪得兩個都咁瘦啦！林鄭身邊嘅人就話，要谷林鄭食嘢唔係無辦法嘅，林鄭嘅弱點係怕浪費食物，官邸廚師煮多啲，佢怕嘥自然就會食多啲啦。