政情：美心東華真惜食
一個麵包丟棄就變成垃圾，如果懂得珍惜，卻可以為有需要嘅貧窮人士帶來溫飽。美心集團與「小寶慈善基金」及東華三院尋日聯手發起「愛包行動」，呼籲全港企業及大專學生齊加入義工行列，協助將美心西餅分店剩餘嘅麵包，直接送到東華三院旗下院舍。
盼今年捐100萬個
美心集團西餅、美心產品總經理李文賢話，美心已號召十九間門市加入愛包行動，亦會呼籲旗下一萬九千名員工加入做「派包大使」。其實早喺○九年，佢哋已率先推行「剩餘麵包捐贈計劃」，單係去年已捐出六十萬個麵包予有需要人士，希望今年可以捐夠一百萬個麵包咁話。
小寶慈善基金行政總監陳妙瑜就話，派包需要大量義工，有興趣人士可以組成二至五人義工組後上網登記，揀好參與日期同路線後，喺當日去指定嘅美心西餅分店收集剩餘麵包後，直接派去有關嘅東華三院屬下院舍就得喇。