每逢香港有大事發生，人稱「搞事四人幫」嘅壹傳媒肥佬黎、「李漢奸」李柱銘、「民主阿婆」陳方安生同「政治（前）主教」陳日君，好多時都會聚埋喺肥佬黎嘅「搞事指揮部」大宅密謀攪局，而臨近七一遊行前夕當然唔例外啦。繼李漢奸同民主阿婆就先後蒲頭呼籲市民七一上街後，尋日就輪到肥佬黎露出狐狸尾巴，佢出席電台節目時，又係不斷呼籲市民七一上街，明眼人一睇就知佢哋想谷遊行人數啦！
肥佬黎喺節目中，明明話有關聚會只係朋友傾吓偈，唔係幕後傾佔中，但轉頭又好肯定話：「我知Martin（李漢奸）一定出（佔中）囉！樞機（陳日君）一定出囉！我一定出囉！」無傾過又點知大家一定會去參與佔中呢？完全係鬼拍後尾枕。佢仲講到明，已經做好坐監準備，聲言「佔中就係坐監，坐監出嚟再坐，坐到普選為止」喎，完全視法治如無物，莫非為咗民主普選就可以連作為核心價值嘅法治都可以放棄？
肥佬黎仲估計，今年七一遊行人數「預想唔到咁多」，會有○三年五十萬人上街咁多喎，擺明就係為七一遊行最後催谷。如果市民覺得有嘢不滿，唔叫都會自行上街，使乜你多此一舉叫人上街呢？
對於「貪曾」前特首曾蔭權爵士嘅連番貪腐醜聞，肥佬黎仲力撐話貪嘅只係好小嘢；講到貪曾被揭發離任後廉價租住「深圳禮賓府」嘅延後利益，佢亦只係輕描淡寫話「呢度係差咗啲」，但就覺得貪曾被人鬧得慘過頭喎，呢啲唔係包庇、不分是非黑白，又係乜呢？