政情：周伯鬧爆貪湯得把口
人稱「周伯」嘅落實子女居港權家長會會長周國輝，一直向中港政府爭取港人內地子女來港定居，前後十四年工作從不間斷。原來周伯同曾任保安局署理常任秘書長嘅「貪湯」前廉政專員湯顯明交過手，但佢狠批貪湯把口話考慮，但實質無幫到手，又批評三任特首愛理不理嘅態度「害咗三代人」，而立會政黨亦只係以利益行先。周伯希望今屆政府任期完結前，能夠徹底解決數萬個港人內地子女來港問題個案。
港府九九年首次提請人大釋法，推翻終審法院首宗居港權案判決，令大批本來可受惠判決嘅港人內地子女喪失居港權。現年七十五歲嘅周伯，過去十四年站喺爭取港人內地子女居港權最前線，見盡港府主責官員升遷同立法會議員更替，究竟邊個係真心幫佢哋，邊個係大隻講，「係人係鬼」一目了然，其中一個為人熟悉嘅名字就係最近爆出貪腐醜聞、豪花公帑買酒兼設宴請客食飯嘅「貪湯」湯顯明。
話說當年周伯同逾千名家長喺舊政府總部示威，最終獲當年做緊保安局署理常秘嘅貪湯等人會面，期間周伯開宗明義話要爭取居留權子女留低，核實身份後發出身份證，當時貪湯僅簡單話會考慮意見，後來事實證明貪湯都係得個講字呃人喎。同樣令人氣在心頭嘅有九七回歸後嘅三任特首，周伯首先批評前兩任特首無見過佢哋，之後又爆料本來對現任特首梁振英（CY）有期望，佢曾兩次去信CY，非但不獲接見連回信都欠奉，所以已經無晒期望。
斥政黨政團只懂利益行先
至於立法會方面嘅表現亦未能令周伯滿意。周伯爆料，立法會過去一直有成立中港家庭事宜小組委員會跟進問題，但去年十月立法會換屆後，呢個委員會靜靜雞取消咗，之後佢曾去信立法會主席曾鈺成問個究竟，得到回覆係無人有興趣繼續跟進，佢直言咁係反映左中右政黨政團淨係識以政治利益行先喎。
講番周伯嘅落實子女居港權家長會，早前有人將呢個組織同爭取子女居港權家長會混淆，但其實兩個係唔同嘅組織。據聞最近周伯仲開始寫回憶錄，至今寫咗五十多頁，相信周伯完成大作後，邊個係人、邊個係鬼，相信會更加清楚。