中環出更：丁毓珠原來係孫泳恩舅婆
早年下嫁法籍練馬師賓康後移居美國嘅首屆香港小姐冠軍孫泳恩（Elaine），不時會返港探望親友。卓妮日前就見到佢同名媛好友林李婉冰孖住出席一個活動，正當佢哋兩個影緊合照時，在場嘅前東區區議會主席丁毓珠突然好熱情咁走上前寒暄一番並合照，原來佢係Elaine嘅舅婆，真係唔講唔知佢哋有血緣關係。
丁退出政圈 仍瞓身地區工作
雖然丁毓珠年前已經退出政圈，但佢話一直都有做街坊會、婦女會等地區工作，更到安老院做義工服務長者，而佢一手創立嘅維多利亞幼稚園（家長簡稱「維記」），就全盤交畀女兒孔美琪打理。問丁毓珠瞓身地區工作辛唔辛苦？佢就笑笑口話：「人就梗係要做嘢o架啦，唔做嘢邊得o架！」佢仲話，喺區議會工作咗二十九年，係時候退居幕後，協助年輕一輩踏出社區。
近年本港出生率回升，幼稚園學位需求大增，唔少家長為咗子女學業爭崩頭。丁毓珠話，維記舊生嘅弟妹甚至子女係有優先權入讀，所以唔少家庭三代都係讀維記。咁唔知佢膝下咁多個乖孫，係咪全部都讀維記嘅呢？
卓妮