中環出更：容永褀「飛常」六月
愛逍遙人生嘅香港專業及資深行政人員協會創會會長容永祺（Samuel），六月忙到只有三日喺香港，唔夠一個月內，佢已飛勻夏威夷、費城、紐約、新加坡等地公幹，尾程再飛去澳洲度假，廿幾日內穿梭南北半球。雖然今次Samuel半公幹半旅遊，但最搞笑係佢出發前就請求太太Louisia陪佢同行，一來無咁悶，二來容太影相靚喎！
身為保險公司高層嘅Samuel，飛美國公幹已經唔係第一次喇，但講到紐約，佢就二十幾年無去過。重遊舊地，咁蹺有個世姪女Karen喺當地做牙醫，「搵食」無難度。
紐約搵食 大擦龍蝦長腳蟹
佢哋先去第五大道品嘗勁量級龍蝦，蝦身重達二十五磅，單係食蝦鉗，已經飽到上心口，但轉過頭又走入另一間食店歎十二磅重阿拉斯加長腳蟹。
連掃兩餐仲未夠喉，Samuel又參觀埋第五大道一條匯聚意大利菜嘅美食街，單係揀意粉都有逾百種，仲有七彩繽紛嘅意國雪糕，淨係睇到都開心到暈。去咗幾日紐約公幹同遊玩，Samuel又轉場飛往獅城開會，再匯合兒子同喺英國讀書嘅女兒，齊齊飛往澳洲出席親友嘅大學畢業禮。
時值澳洲觀鯨季節，Samuel又點會錯過去黃金海岸睇鯨魚呢？佢哋齊齊登上觀鯨船出海，果然近距離睇到巨鯨飛躍出水面，又不時噴水、擺動重磅巨尾，場面壯觀，總算不枉此行。佢返港後幾日，依家又去峇里公幹，唔知佢有冇計過自己一年有幾多時間喺香港呢？
卓妮