政情：黃玉山過檔 陳繁昌不捨
港區全國人大代表兼科技大學副校長黃玉山，明年就會過檔公開大學做校長。科大校長陳繁昌尋日孖住黃玉山出席一項活動時，就當面話好唔捨得黃玉山走，事關當年嘅十位科大「開荒牛」教授，幾乎全部都退晒休，現時只剩下黃玉山一個。
不過，從另一角度睇，佢覺得黃玉山過檔其他大學未嘗唔係一件好事，可能會促進兩間院校合作都唔定喎。
臨別頻合照留念
話說當年科大由十個教授合力創校，設計課程、收生等細節都要一腳踢。自一九九○年起加入科大嘅黃玉山，係創校成員之一，雖然期間佢曾經跳槽城市大學出任副校長，但始終對科大情有獨鍾，○六年重回科大出任副校長兼生命科技教授至今。
黃玉山都承認，喺科大執教鞭多年，對校園嘅一草一木都好有感情。臨別在即，陳繁昌都好衷心咁恭喜對方，兩人出席活動時更不時一同拍照留念。
除咗黃玉山，科大商學院院長鄭國漢都將喺九月出任嶺南大學校長，科大頓失兩位人才，睇嚟陳繁昌未來要努力廣納賢能喇。