政情：曾憲梓激氣 囝囝急送走
前全國人大常委曾憲梓經常對泛民主派所作所為當頭棒喝，但過去一段時間就未見佢出嚟評論吓「佔領中環」（佔中）行動，但隨着行動愈炒愈熱，佢尋日終於現身反擊，炮轟佔中最終目的係破壞一國兩制，期間又激動高呼「反對佔中」口號。不過，曾憲梓嗌咗一陣，大仔曾智明可能擔心老父太激動，唔夠空氣會頭痛，即時護送坐住輪椅嘅老父離開會場。
曾憲梓上次公開月旦時事已係今年一月中，大鬧高舉港英旗嘅人「唔係香港人，更加唔係中國人」，事隔五個多月後，佢尋日出席一活動後又發表對佔中嘅睇法。曾憲梓形容，佔中破壞香港法制、金融、商界，令市民唔方便，咁係對香港無好處，更加字字鏗鏘咁話佔中嘅最終目的係破壞一國兩制。
佢又批評佔中發起人之一嘅港大法律教授戴耀廷只係「象棋子嘅水平」，之後再高呼「反對佔中，中央支持香港發展」嘅口號。
評七一遊行較溫和
相對於嚴詞反佔中，曾憲梓回應七一遊行就溫和得多，佢話遊行係好事，因為不論支持政府同反對派都可以表達意見，又相信中央好明白、好了解遊行嘅意圖喎。