關愛基金已成立兩年，當初打算由政府同商界齊齊注資，可惜一直以來政府向商界撲水都好困難。政務司司長林鄭月娥尋日出席活動時公然話已無意向商界勸捐，唔通林鄭已經對商界捐款死心？關愛基金專責小組主席羅致光聽到林鄭咁講都嚇咗一跳，急忙澄清關愛基金仍然歡迎商界捐獻，只係唔再積極揼商界心口啫。
林鄭尋日出席智經研究中心同社會服務聯會合辦嘅「扶貧及商界參與」論壇，佢致辭時話，呢兩年啲人講起扶貧都會諗起關愛基金，佢都認同關愛基金有存在意義，但政府已公開表明無意向商界勸捐，而政府將於下周五向立法會財務委員會申請額外注資一百五十億元入關愛基金，以加大扶貧力度。
大家聽完林鄭咁講，差啲以為關愛基金唔再接受商界捐款。身為主席嘅羅致光即刻幫林鄭兜番，澄清關愛基金仍然好歡迎商界捐錢，只係唔再積極揼人心口啫。羅致光仲呼籲商界，扶貧唔止要出錢出力，仲應該出埋腦，諗吓計點樣喺扶貧市場搵到企業自己嘅角色喎，莫非佢當正啲財團正職係扶貧？