政情：Greg蘇開綠燈咪偏心
本報《政情2.0》日前報道過，正在美國訪問嘅商務及經濟發展局局長蘇錦樑（Greg蘇），大力游說美國電影業到港取景，有人擔心港府怕麻煩，好多地方都唔敢借出來畀人拍戲。不過，Greg蘇尋日就帶來好消息，原來喺電影《雷神奇俠》（THOR）飾演「雷神」嘅基斯漢斯禾夫（Chris Hemsworth），擔正做男主角嘅新戲稍後會到香港取景，據聞其中一場將會喺中環鬧市拍攝添！
港電影業亦嘆取外景難
Greg蘇尋日繼續訪美行程，期間同美國著名導演米高曼（Michael Mann）同「雷神」短聚約二十分鐘。有人奇怪在Greg蘇同米高曼、「雷神」兩人大纜都扯唔埋，究竟當中有乜關連呢？查實米高曼最近正在拍攝新驚慄片，依家正喺洛杉磯取景中，之後更加會到香港取景，所以Greg蘇率先去探班打氣，有指米高曼等人來港取景時，Greg蘇都可能會到場支持喎。
話時話，今次「雷神」到港拍戲獲港府「開綠燈」，對於業界嚟講絕對係好消息，但值得留意嘅係香港電影業近年周時埋怨外借場地取景困難，有人提醒當局最緊要唔好「大細超」，同時積極支持本地電影拍攝。