中環出更：呂鈞堯「星」空奇遇記
空中奇緣多，遇見大明星亦唔出奇，好似前保良局主席呂鈞堯（Quincy）上月下旬飛印尼峇里出席大學同學婚禮，竟然喺機艙遇見人氣國際組合「美聲男伶」IL Divo，開心到不得了。原來Quincy係IL Divo超級粉絲，○八年已係歌迷，幾年前IL Divo來港開騷，佢都撲飛入場一睹偶像風采，所以今次與偶像同機，真係high過中頭獎。
與偶像同機冇合照
Quincy話，一見IL Divo靚仔成員，佢馬上拿出手機幫太太Miyoung影相，但就興奮到唔記得幫自己影，認真可惜。跟偶像近距離接觸，Quincy大讚對方靚仔又冇架子。更蹺嘅係，回程時，Quincy又再次與IL Divo同機，呢次佢再次讓出合照機會畀太太，咁抵得諗，認真有風度。
去到峇里參加婚禮，Quincy與太太及囝囝Nathan不忘享受陽光與海灘，輕鬆吓。潛水呢？Quincy話怕高危，咪搞喇。咁錫身係有原因嘅。原來呂太再度懷孕，BB十月出世，仲係孖B嚟添，將升呢做三B之父，難怪Quincy更加錫身啦！