政情：今日你上鏡：糕賞三軍

一間公司成功背後唔少得一班賣命嘅員工，好似香港專業及資深行政人員協會副會長兼地產公司高層黃偉雄（Addy），就不時出冧招慰勞員工。我哋早幾日下午喺中環遇見Addy同公司董事郭楚華挽住大袋蛋糕，唔通準備開生日派對？原來佢哋啱啱同經理級同事開完會，睇見附近餅店有出爐芝士蜜糖蛋糕，即時掃咗三大個，醒員工做下午茶，認真唔話得。Addy笑言，早前儲落大疊餅卡，想話拎幾打西餅去老人院探訪，但社工話老人家口味要清淡，所以佢就試食蜜糖蛋糕，試啱下次再大手入貨喎。