政情：廢腑之言：局長播錄音帶都有技巧
政府官員回應議員質詢時「播帶」，相信市民都習以為常。亦有官員自己唔認播帶，但講嘢同播帶無分別。政制及內地事務局局長譚志源尋日喺立法會回應二○一七年特首產生辦法時，再拋「適當時候展開廣泛諮詢」呢啲三幅被答案，人民力量陳志全（慢必）追問政府立場時就忍唔住諷刺譚志源「係咪要播錄音帶？」
向來EQ爆燈嘅譚志源施展急才，回應咗句「錄音帶冇喺度」，幽番慢必一默。咁又係，譚志源本身就係一部「人肉錄音機」，播帶使咩錄音帶？另外，運輸及房屋局局長張炳良被議員批評回應提問「照稿讀」時，亦死撐自己係經過思考，認同內容先照稿讀。
