政情：陳恒鑌考察山區診所
身為潮州人嘅立法會議員陳恒鑌（Ben）話自己細個喺普寧鄉下長大，成日唔着鞋通山跑。六歲嗰陣有「赤腳醫生」之稱嘅鄉村醫生去到佢條村，話可以幫小朋友免費做體檢。當時尚算健碩嘅阿Ben跳跳紮咁去做體檢，但點知就畀醫生檢查到佢嘅肝臟比其他同齡小朋友大，診斷佢懷疑患上流行性甲型肝炎。
籌款改善醫療設備
阿Ben話當時有段時間成塊面病到黃晒，又成日暈同嘔，之後聽村醫話食藥休養，三至四個月後就完全康復。就係因為村醫曾經救佢一命，阿Ben一直諗計希望可以改善山區貧窮村落嘅醫療設備，以答謝村醫當年嘅救命之恩。
立會前排休會幾日，阿Ben就同幾個朋友去韶關山區考察鄉村醫療所，又同鄉村赤腳醫生交流。佢返香港後決定喺年底舉辦大型籌款活動同慈善音樂會，籌款為韶關部分貧窮山區村落翻新同重建已經破爛不堪嘅醫療所。阿Ben嘅計劃仲得到醫專會主席江明熙（Bernard）支持，Bernard依家正幫手招募醫生義工，明年年初就會齊齊出發去韶關為當地村民進行身體檢查。