中環出更：幫襯快餐店梁太試新嘢
特首夫人梁唐青儀形象一向親民，估唔到佢連飲食習慣都好平民化。卓妮前日下晝喺中環逛街，咁啱見到梁太睇完靚衫之後，走咗入一間美式連鎖快餐店買外賣。梁太毫無架子咁乖乖跟住排隊，之後仲諗都唔使諗，爽快咁柯打咗一個新推出嘅黑色漢堡包及一杯凍飲，莫非佢經常都去幫襯？
當日下午近兩點鐘，戴上珍珠頸鏈、身穿桃紅色連身及膝裙加黑色長袖外套嘅梁太，單拖現身中環置地廣場。當時佢拎住部手機邊行邊，冇幾耐走入一間著名台灣品牌服裝店睇衫。店員一見特首夫人光臨，即大獻殷勤，主動拎咗幾件衫畀梁太睇，但佢睇咗十分鐘都唔多合眼緣，結果冇買到就離開。
買漢堡包醫肚
跟住梁太沿住皇后大道中慢慢行，可能行完街覺得肚餓，隨即走入萬邦行旁邊一間位於地庫嘅連鎖快餐店買外賣醫肚。店內地方淺窄，遇着午飯時間都幾逼人，但梁太好低調咁默默排隊，所以冇人認得出佢。之後佢散叫咗個「黑漢堡」同凍飲唔要薯條，價錢比連薯條嘅套餐仲貴，但梁太為咗健康，貴啲都冇所謂啦！
梁太買完外賣之後，繼續前行至利源東街一棟大廈，等坐升降機上寫字樓。卓妮趁機上前同佢打招呼，佢好親切咁微笑，然後話自己早上只係食咗少少嘢，所以要再買個包果腹，最後好nice咁同卓妮講拜拜。梁太食快餐醫肚，果然同老公一樣節儉。
卓妮