立法會議員經常都要開會，萬一遇着「拉布」，更加要日以繼夜、夜以繼日咁坐定定喺度，不知不覺就「肥」咗。議員田北辰（田二少）近日就買咗部健身纖體用嘅震動板，諗住企上塊板震兩吓就可以「震」走脂肪，但唔知係佢使用方法唔正確，定係使用時間太短，佢話「震」咗咁耐一安士都減唔到，仲搞到頭暈暈添！
話說喺母親節前夕，田二少喺立法會「拉布戰」期間抽空去商場買張母親節賀卡畀太太，點知買完賀卡之後，佢就喺店舖外見到有按摩用品店做展銷，於是就貪得意去睇吓。田二少話，個售貨員同佢介紹咗一塊可以健身纖體嘅震動板，企上塊震動板震震吓，就可以促進腸部運動，有助纖體咁話。田二少聽完即時落疊，買咗塊返屋企，諗住既可以幫自己減肥，亦可以當母親節禮物送畀太太。
不過，田二少嘅減肥計劃就唔多成功，因為佢玩咗成個星期都冇咩成效，仲激氣咁同我哋講︰「一安士都減唔到，仲震到我頭暈暈！」
據了解，塊震動板賣成六千多元，睇嚟田二少真係要用真啲、用耐啲部機，試清楚有冇效，同埋做運動減肥都要各項配合，如果食得多嘅話，咁就無效都唔奇。