中環出更：杜振源進軍飲食界行膳籌款
身為國際小母牛香港分會籌款委員會主席嘅「快勞夾大王」杜振源（Simon），本身做開文具生意，但佢年前就開始進軍飲食界，今年底仲會開多三間食肆添，咁進取，莫非佢想做埋「飲食大王」？Simon話，現時旗下兩間餐廳已有定期舉行籌款晚宴，籌得善款全數撥捐畀小母牛，雖然數目唔算多，但勝在多多益善喎。
Simon日前就邀請一眾老饕好友，到佢位於中環雲咸街開設嘅高級多國菜餐廳試菜兼畀意見，順道交流籌款嘅事。佢特意吩咐大廚炮製精緻佳餚，馬會大董葉澍堃（Stephen）夫婦、佳能香港副總裁鄧慶治、「演唱會之父」張耀榮千金張麗芳及丈夫鄧偉業、著名耳鼻喉專科醫生黃漢威、前仁濟醫院主席吳守基（Wilfred）等，個個食到舔舔脷。
佳餚紅酒 招呼好友
一向嘴刁嘅Stephen，都對美饌讚不絕口，尤其一道鮮嫩無比嘅香煎法國龍脷柳Dover Sole，配以清新嘅檸檬橄欖油醬汁，搞到佢減緊肥都忍唔住口。Wilfred就帶來兩年前喺小母牛籌款活動中，由Simon捐出、畀佢投得嘅「神之水滴」RICHEBOURG紅酒，與好友分甘同味。Simon都早有預備，拎出一箱一九八二年釀製嘅靚紅酒招呼賓客，絕不欺場。
卓妮