以往有富貴議員包底
據知情者透露，每次飯局都有廿幾位議員出席，埋單都唔係小數目，其實每人應該分擔六百蚊。以前就話有黃宜弘（中指黃）、詹培忠兩位身家豐厚嘅議員包底，但自從今屆二人退任，大家出手明顯寒酸咗。最近嗰次，每人科水四百，林大輝喺會上發表咗偉論，食到魚就走，擺低二百蚊走人。
雖然中指黃出晒名係「立會懶蟲」，但都有人話好懷念上屆有佢自掏荷包之餘，帶埋私伙靚酒出嚟分甘同味，依家就只得清茶淡飯。聽講較有財力嘅譚耀宗已經捱義氣頂咗兩次飯局尾數，林健鋒亦曾包底一次。奈何長貧難顧，睇嚟佢哋真係要諗諗計解決。有人建議實施「輪流包底制」，唔使個別議員咁肉赤。