立法會議事廳上位方法有好多種，工聯會王國興除咗靠寫大字反拉布而寫出名堂，上星期出席特首答問大會仲帶咗隻血淋淋嘅斷腳道具趁墟，促請政府盡快將單肢傷殘人士納入傷殘類別。雖然斷腳問題無緣上場提問，但依然吸引議員目光，其中資訊科技界莫乃光仲作狀話要向主席舉報隻斷腳「好核突」，蔣麗芸（Ann）睇見斷腳亦嚇到花容失色、面容扭曲。成功上位嘅王國興就話，其實前年開始逢親討論同類議題都會帶佢開工。望就望班議員睇在斷腳分上，快啲投票通過議案，咁就唔使再喺議事廳引起恐慌喇。
