政情：公民講場：椅都未坐暖 廢鑊跟風攞錢

預算案「拉布」正膠着，政府同「拉布四子」上星期五和談破裂後，政府連日另展輿論戰，巡迴宣揚臨時撥款即將用完，幾十個政府部門財政瀕陷乾塘。而四月一日愚人節剛履新嘅平機會主席周一嶽（周一鑊）亦驚死執輸，拉衫尾加入巡迴趁機抽番啲油水。周一鑊尋日出席完活動時就話，平機會目前只有二千多萬元儲備，只佔以往每年九千多萬撥款嘅兩成幾，加上儲備只係用作緊急需要及研究之用，擔心不足出糧畀平機會八十多名員工。可能佢唔記得咗以為自己仲係做緊局長啦，所以人哋打鑼打鼓，佢咪打埋一份囉。