「佔領中環」具體細節未定，但係已經挑動各方神經，但活動發起人之一戴耀廷尋日接受電視台訪問時就狀甚無辜咁話自己唔係造反，而係做緊公民教育，讓大家去諗吓點樣去建構一個更好嘅民主制度。戴耀廷估計，具體特首普選方案喺明年先會出現，仲話已經預留咗一年嘅時間，有足夠位置去讓談判出現。不過，唔知呢個會唔會只係佢嘅主觀願望呢？
戴耀廷尋日話，其實中央同佔中活動已露出對普選方案底線，至於之後要點走番埋一齊，佢就好樂觀同態度開放咁話，其實普選方案要符合《基本法》同國際標準都「好容易」，只係視乎點詮釋《基本法》。佢估計，最後經全民投票得出嘅特首普選方案唔會太激進。
至於問及會否與北京談判，戴耀廷就話：「肯定唔會無談判空間」，事關佢將佔中活動拖到咁長嚟搞，首先要經公眾商討，再經全民投票，其實都只係想預留位置畀談判出現，希望唔使行到佔中最後一步。
之不過，喺北京眼裏，佢係邊位呢？而泛民又會唔會任由呢個搞公民教育嘅書生出去談判呢？其實佢嘅處境，睇落都幾寂寞。