尋日係母親節，社交網站上嘅議員們「洗版」上載慶祝母親節嘅活動。點樣突圍而出？葉劉淑儀嘅黨友田北辰（田二少）搭建巨型吹氣滑梯慶祝，出奇招娛人又娛己，平日衣着高貴兼襯過晒先出門嘅葉太，竟忍唔住放低幾吋高嘅高跟鞋枷鎖，赤腳同小朋友玩埋一份。唔知玩得開唔開心呢？由網上嘅相睇嚟，佢就有少少拘謹嘞，而設計活動嘅田二少，當然都有除鞋一齊玩啦。
葉太玩完吹氣滑梯，又晒愛女葉榮欣（Cynthia）有幾咁貼心，Cynthia趁尋日母親節正日，安排泰籍按摩師上門幫媽咪按摩，「梳乎」兩個鐘後再孖公仔出發去食飯，不知幾甜。
另一邊廂，謝偉俊（Paul）喺佢嘅選區內以一身白色短褲襯鮮黃色西裝褸，再以一對白襪仔配螢光黃色波鞋落區派花，襯色襯到咁絕，街坊想睇佢唔到都好難。Paul呢一身「巨鴨」造型其實早前都曾經亮相，早幾日佢就係着住呢件鮮黃色嘅西裝褸去尖沙咀海旁同巨鴨合照，不過佢上次着橙色鞋，襯番個鴨嘴，今次着黃色鞋，睇嚟都頗受區內媽媽歡迎。