黃錦星（KS）做得環境局局長，當然要做慳水慳電嘅環保代言人，佢曾經同前天文台台長林超英鬥交少電費，又講過沖涼可以幾快，表示自己慳水。佢嘅環保招數原來仲未乾塘，尋日佢又身體力行，話自己自攜膠盒去買麵包。
KS尋日母親節早上要去電台接受訪問，講開點樣慶祝母親節，佢話因為佢嘅老婆大人愛吃麵包做早餐，於是晨咁早落街買包。為咗唔用袋，佢仲帶住個膠盒同環保袋落街去買，一買三個，一個用嚟冧老婆、一個用嚟畀至錫嘅乖女，最後一個留畀自己。KS話，其實用膠盒盛載都幾好，載兩、三個包都唔會扁，又可以保持新鮮，最緊要係慳咗個袋。話時話，母親節又唔係情人節，點解要由佢去買麵包孝敬老婆呢？
KS話，遲啲擴展後嘅膠袋徵費計劃，基於食物衞生問題，直接包住食物嘅膠袋費用可獲豁免，佢話明白市民可能會混淆，會圖文並茂咁加強宣傳同教育。其實好簡單啫，市民帶多幾個盒去買餸，除咗買麵包之外，買西瓜、鮮魚、肉類都用膠盒盛載，咁咪全部膠袋都慳番囉。