政情：貪湯做政協靠女友?

話說十幾年前做緊保安局副秘書長嘅貪湯，同Helen發展地下情。有知情人士話，Helen不時跟當時嘅入境處處長李少光返大陸訪問，識落唔少內地官員，Helen返香港之後，竟然以私人身份再帶貪湯返大陸一轉，去結識呢班內地官員。原來經過幾年打好「基礎」，難怪佢可以做全國政協啦。湯、陳二人情比金堅，貪湯去邊都要帶埋Helen去，但Helen又唔係湯太，有時令活動嘅主辦單位幾為難，唔知點安置呢位「陳小姐」。原來Helen咁幫得手，負責幫貪湯搭通天地線。

傳搵三女督察唱歌擦鞋

去到海關，有海關人員話貪湯在任時無乜建樹，但荒唐事就一籮籮，由於中港澳海關經常舉行體育比賽呢類聯誼活動，夜晚例必有下場，內地文宣部有一隊「辮子兵團」，即係由全女班上台唱歌獻技，有投訴人報料話，當時貪湯亦想喺海關搞番隊「辮子兵團」，但惹來好大反對聲音，最後當然擱置，但有擦鞋友點都要做番啲嘢，最後搵咗三個女督察上台唱歌，仲拍低咗短片，係真係假，真係要當事人至知。

該名海關人員仲話，有茅台專員之稱嘅貪湯，○六年某日半夜三更飲到酩酊大醉，佢用政府車送女友Helen返家，途經海底隧道時發生交通意外，佢即電召一名海關官員到場幫拖，最後同對方和解了事，無按程序向政府部門呈報事件，而係自行搵人修理好架車。

貪腐侵廉署 最衰貪曾

熱愛打高球嘅貪湯，每逢到內地打波，班海關下屬都會幫佢訂好晒場地同酒店，認真唔話得，結果齊齊升官。貪湯○七年七月準備去法國訪問，突然被「貪曾」曾蔭權急召接替羅范椒芬做廉政專員，結果將貪腐文化帶埋去廉署，所以貪湯鍾意擦內地官員鞋同飲飲食食，絕對唔係一朝一夕，但就搞到廉署聲譽衰到極！

尋日最新鮮熱辣傳出一宗舊聞，係貪湯喺一○年只以齋啡款待加拿大一位部長，而無請佢飲茅台，足見佢親疏有別，唔會嘥鞋油，去擦無利用價值嘅人。