中環出更：利子厚沉醉仙境 五日冇剃鬚
馬會大董利子厚（Michael）一向熱愛運動，佢日前仲相約一班朋友，首次遠赴斯里蘭卡遠足十天。Michael大讚當地風光秀麗，青山綠水，恍如世外桃源，令佢進入渾然忘我嘅境界，試過五日冇照過鏡，直至某日友人遞來一塊鏡，至驚覺自己已滿面鬍鬚，急忙拎起鬚刨，執番企理個樣。
斯國十日行咗百五公里
此程Michael自攜十五公斤背包，於斯里蘭卡首都科倫坡以北嘅郊區遠足，以日程十五公里行足十日，即係總共行咗一百五十公里，腳骨力認真驚人。事後Michael發覺，其實有部分行李係多餘嘅，例如衣物根本唔使帶咁多，可以喺途中洗完再着。佢仲話喺出發之前，身邊唔少醫生朋友輪流送贈藥包畀佢以防萬一，結果塞滿一篋行李，笑言下次會帶少幾包。
Michael話，斯里蘭卡政府曾經與游擊隊嘅內戰持續二十五年，當地一度成為禁地，難得依家能夠親身遊歷。行程中，佢仲見到回教寺及佛寺共存於一個島內，體現到宗教嘅和洽咁話。