中環出更:愛心咖啡贈夫 李錦記新抱體貼

靚太唔易做。好似李錦記新抱Mahnaz Lee,熱心公益之餘,經常都要掛住送驚喜畀老公。上星期五中午一點,卓妮撞見戴上珍珠頸鏈,一身貴氣打扮嘅Mahnaz獨自行中環ifc,見佢行入一間咖啡專門店,精挑細選後,終於買咗一袋戰利品。莫非買咖啡賀母親節?

原來佢份禮物,係送畀老公李惠雄至真。買到心頭好之後,Mahnaz興高采烈行入三樓一間意大利餐廳,會合一班好姊妹歎西餐。呢間餐廳有落地玻璃,可以俯瞰維港美景,氣氛都幾浪漫。

不過老友坐滿一枱,熱鬧到極,大夥兒傾到雞啄唔斷,風景都唔得閒睇。Mahnaz全程有講有笑,當傾到興起嘅時候,開心到拎部手機出嚟與朋友們自拍一番。所以話,自拍呢樣玩意,唔係後生仔女專利。

搞慈善晚宴助單親婦女

餐飯一食三粒鐘,一班好朋友講乜咁開心呢?原來Mahnaz嚟緊十一月將為佢創立嘅慈善團體「心蓮心」搞周年慈善晚宴,今次係為單親婦女籌款,協助佢哋自力更生。由於大騷當前,Mahnaz暑假都唔打算去旅行,一於瞓身投入活動,希望好友多多支持佢喎。

卓妮

第一手消息請下載on.cc東方互動iPhone/iPad/Android/Windows Phone Apps