貪湯醜聞一大籮，愈揭愈臭，愈揭愈遠，醜事遠近糾纏，遠的如任海關關長期間濫用政府飛行服務資源「公費遊飛機河」，仲將「擦鞋」奉承文化帶進海關。老朽不禁撫鬚吟曰：仕途漫漫其修遠兮，我將上下而打點！
至於近嘅，水蛇春咁長，真係無處下筆，好似酬酢超支、收禮送禮、「用盡海陸空，接載食海鮮」；呢呢呢，廉署回覆立法會帳委會提問時更揭露，貪湯任期內，廉署部門一般開支，由每年六千萬元暴增五成至九千萬元，惟當時人手編制並無擴大。美國前國務卿基辛格有名言：「權力是強烈的催情劑。」對貪湯而言，無王管的權力，更是強烈嘅使錢劑；唔做大花筒，愧對份筍工，一個人想點就點，怎會記得「孔雀開屏都會露出最醜陋嘅屁股啊！」貪湯任廉政專員五年，貪威識食，為所欲為，無疑砸爛廉政公署個「廉潔奉公」招牌，其個人混帳混吉劣行，更丟盡香港公務員效率高、形象佳個架！每年開支暴增五成，使多三千萬，若非增人手反貪倡廉，呢筆增幅認真要老老實實查一查，相信立法會帳委會一旦調查完成，「真相自當水落石出！」問世間，錢為何物，直教人生死相許。
回歸十六年，經過貪曾七年禍港，加上貪湯陋習一大籮，香港當今政治形勢，香港官場明顯染上內地官場好飲好食，公帑送禮當人情嘅歪風！
事實上，要擺脫貪曾、貪湯的荒唐、不正行徑，香港的政治文化，處於如此深層矛盾不斷加深的局面，更應公開、透明，以促進社會的公正公義。
要市民養成健康嘅政治心態，積極擁抱普世價值，政府不能再苟且下去，試問貪曾下台一年有多，廉署調查認真「密密實實」，悶聲又豈可大發財？廉署調查，如今變成「天下英雄誰敵手？沒有。老子就是一把手！」香港死得。