政情：林健鋒符碌扑中5.8萬三重彩
人逢喜事精神爽，行政立法雙料議員林健鋒（Jeffrey）近日紅光滿面，原來佢喺五一勞動節假期當日，入沙田馬場撐老友嘅愛駒出賽，點知無心插柳之下中咗注三重彩，將五萬八千多元彩金袋袋平安，認真和味！Jeffrey笑言，今年係第一次中三重彩，於是即時請晒班老友食飯，與眾同樂。
Jeffrey話，當日佢入場係為咗捧老友愛沙尼亞駐港名譽領事林建康夫婦匹愛駒「勇敢福星」。雖然匹馬三甲不入，但既然入得場，於是就落注第八場盃賽碰碰運氣。
反白眼膠鴨絕不修改
佢話冇人畀貼士佢，只係眼見落住毛毛細雨，咁啱嗰場係泥地賽，於是揀選兩匹比較熱門嘅馬匹，再搭一匹冷門馬「天賦傳奇」，博佢爆冷，冇諗過咁都會中，真係好彩。
講番Jeffrey前日喺立法會派發其公司製造嘅玩具膠鴨，佢話隻鴨係多年前嘅設計，依家攞出嚟只係懷舊一番。對於有人話隻膠鴨雙眼半反白看來冇乜精神，Jeffrey就反而覺得隻鴨好得意，絕對唔會更改膠鴨嘅設計喎。