政情：母親節送禮 議員頭痕
明日就係母親節，好多立法會議員都要花心思同媽咪慶祝，好似陳恒鑌（Ben）同漁農界何俊賢（高佬賢）咁，雖然佢哋已決定同屋企人食飯，但就為送禮物一事而苦惱。阿Ben就被媽咪投訴佢咁多年都淨係落區送花畀其他母親，反而自己咁耐一支花都冇收過，所以慚愧嘅阿Ben就決定送番紮花畀媽咪補數。不過，高佬賢媽咪要求仲高，話想換架新車。
高佬賢話，媽咪之前同佢暗示過想換架新車，但佢就好坦白話自己買唔起多一架新車，所以惟有向媽媽介紹相熟嘅車房經紀，另加兩支黨友落區派發嘅毛巾花，就當係母親節禮物喎。不過，高佬賢話聽日會親自買響螺煲愛心湯畀媽咪飲，但餐飯始終要勞煩媽咪落廚，似乎高佬賢過緊「兒子節」多啲喎。
葉劉獲愛女送按摩服務
不過，佢哋兩個點樣準備，都唔及新民黨葉劉淑儀愛女葉榮欣（Cynthia）咁有媽咪心，事關Cynthia知道媽咪日日喺立法會工作好辛苦，於是就趁住母親節預約一個泰籍按摩師上門幫媽咪按摩，等媽咪足不出戶就可以過一個窩心而舒服嘅母親節。